Bakı, 19 mart, AZƏRTAC
Beynəlxalq Mühəndislik Akademiyasının onlayn ümumi hesabat-seçki yığıncağı keçirilib.
Bu barədə AZƏRTAC-a Beynəlxalq Mühəndislik Akademiyasından məlumat verilib. Bildirilib ki, yığıncaqda Avropa, Asiya və ABŞ-dan olan akademiya üzvlərindən 339 nəfər iştirak edib. Hesabat məruzəsi ilə akademiyanın prezidenti, akademik Boris Qusev çıxış edib.
Məruzə ətrafında müzakirələrdə Azərbaycan Mühəndislik Akademiyasının vitse-prezidenti, akademik Əhəd Canəhmədov akademiyanın 2020-ci ildəki işinin əsas nəticələri haqqında məlumat verib.
Sonra Beynəlxalq Mühəndislik Akademiyasının rəhbər orqanlarına gizli səsvermə yolu ilə prezident, vitse-prezidentlər, Prezidentlər Şurasına üzvlüyünə seçkilər keçirilib.
Akademik Boris Qusev yenidən Beynəlxalq Mühəndislik Akademiyasının Prezidenti seçilib. Azərbaycan Mühəndislik Akademiyasının Prezidenti, akademik Arif Paşayev yenidən Beynəlxalq Mühəndislik Akademiyasının vitse-prezidenti, həmçinin Prezidentlər Şurasının üzvü seçilib.
Akademik Əhəd Canəhmədov isə Prezidentlər Şurasının üzvü seçilib.
Ümumi yığıncaqda qərara alınıb ki, 2021-ci ilin may ayında SSRİ Mühəndislik Akademiyasının, Beynəlxalq və Rusiya Mühəndislik Akademiyalarının yaradılmasının 30-cu ildönümü qeyd olunacaq və akademiya üzvlərindən bu tədbirdə fəal iştirak etmələri xahiş olunur.
